Sunday, March 25, 2007

داستور ياهل الدار


من بين المواد اللي هيتم الاستفتاء عليها بكره وقفت شوية قدام المادة 136 بتقول .. لا يجوز للرئيس ان يحل مجلس الشعب الا عند الضروره وبعد استفتاء الشعب واذا وافق الاغلبيه يصدر قرار بحل المجلس .. اما النص المقترح هو انه يصبح عند الضروره واذا حل المجلس في امر فلا يجوز ان يحل المجلس الجديد لذات الامر.. شالوا استفتاء الشعب .. للدراجادي وصل الضحك عالدقون .. عايزني اوافق علي عدم اخذ رأيي؟؟ .. ان كل حاجه تبقي في ايد الريس؟ والشرط الوحيد ان سبب الحل ميتكرش مره تانيه؟؟ (طبعا هيلاقوا ميت سبب وميت ضروره)

---

في حوار مع الاهرام قال السيد مفيد شهاب " لم تعدل المادة 77 الخاصة بمدة الرئاسة لأنه مصادرة لإراده المواطن مسبقه "

اكيد انت بتهزر اكيد الصحفي مفهمكش كويس .. اما نحددها بمدتين يبقي دي مصادره لإراده المواطن؟ .. يا عيني علي ارادة المواطن الامريكي المصادره .. دول قعدوا يتحايلوا علي نيلسون مانديلا انه يكمل بعد المدتين وهو مرضاش .. طب نخليها مدتين وبعدين ونتحايل عليه و يبقي يقعد تلاته واربعه وعشره!

كلامك خساره فيه التعليق .. كلامك يتضحك عليه!

---

مادة 88

التعديل : سيتم اختيار لجنه عليا للاشراف علي الانتخابات .. وصحيح هي مكونه من اعضاء هيئات قضائيه سابقين وحالين .. بس مين اللي هيشكلها
يا تري؟؟ .. مين غير الحزب الحاكم .. فعلا حاميها حراميها .. وسلملي عالاشراف القضائي!

---

مادة 82

قبل التعديل : اذا قام مانع يحول دون مباشرة الرئيس لاختصاصاته اناب عنه نائب رئيس الرئيس وطبعا عشان نائب الرئيس ميمسكش الحكم زي مالريس عمل ولكي لايخرج الحكم من العائلة الكريمة .. تم اضافة او رئيس مجلس الوزراء عند عدم وجود نائب رئيس او تعذر نيابته.

وطبعا هتتعذر لأنه اصلا مش موجود .. ياللا مشيها رئيس الوزرا واهو يبقي زيتنا في دقيقنا.

بقيت الماده

"ولا يجوز لمن ينوب عن رئيس الجمهورية طلب تعديل الدستور او حل مجلس الشعب او مجلس الشوري او اقاله الوزاره"

دا رئيس ايه دا لمؤاخذه يعني مش واخد بالي!

---

مادة 179

مكافحة الارهاب .. دسترة حالة الطوارئ "المؤقته" بس علي انقح.

بعد اصدار القوانين الخاصه بهذه الماده .. هيكون من حق اي امين شرطه ميساويش تلاته مليم انه يدخل بيتك ويضربك ويتهجم عليك ويعتدي علي اهل بيتك ويجرجرك عالسجن من غير اذن نيابه ومن غير تهمه ومش هتعرف تقوله تلت التلاته كام.

- إضافه :

تعطي هذه الماده الحق لرئيس الجمهوريه ان يحول اي جريمه من جرائم الارهاب الي اي محكمه موجوده .. يعني اي واحد مش عاجبه يبقي بالسلامه ..

ملحوظه .. تعريف كلمة الارهاب في القانون المصري الصادر عام 1992

"
كل استخدام للقوة والعنف أو التهديد أو الترويع يستهدف الإخلال بالنظام العام أو تعريض سلامة المجتمع وأمنه للخطر ـ إذا كان من شأن ذلك إيذاء الأشخاص أو ترويعهم أو تعريض حياتهم أو حرياتهم أو أمنهم للخطر، أو الحاق الضرر بالبيئة أو بالاتصالات أو المواصلات أو بالأموال أو بالمباني أو بالأملاك العامة.. أو منع عرقلة ممارسة السلطات العامة، أو دور العبادة أو معاهد العلم لأعمالها، أو تعطيل تطبيق الدستور أو القوانين أو اللوائح."

شوف انت بقي يا حلو بتعمل كام حاجه من دي!

- تعطل هذه المادة .. المواد 41 و44 و 45 الخاصه بحقوق الانسان.

---

انهارده في الجامعه وزع طلاب الاخوان ورقه المفروض انها مجله اسمها بوليتيكا كاتبين رؤيه نقديه للتعديلات الدستوريه :

مادة 5

بعد التعديل : "لا تجوز مباشرة اي نشاط سياسي او قيام احزاب سياسيه علي مرجعيه دينيه او اساس ديني .."

المهم تعليقهم

".. ونحن اذ كنا متفقين مع حظر الاحزاب علي اساس ديني فان الحظر السياسي يضعنا في اشكالية مقصد الحكومه من هذا التعديل والادهي انه يتعارض مع الماده التانيه من الدستور .. "

الله يعني الماده التانيه شغاله اهو؟؟ امال ايه نصلح الدنيا بالدين؟؟ مهي الدنيا متصلحه والماده التانيه حلوه اهيه

وبعدين ازاي متفقين مع حظر قيام احزاب علي اساس ديني وازاي بتقولوا بتتناقض مع الماده التانيه؟

نكمل :

" .. ليس هذا فحسب بل ان قانون الاحزاب يحظر قيام الاحزاب المخالفه لأسس الشريعه الاسلامية .."

يعني ايه بردو ؟؟ الشريعه مطبقه ولا مش مطبقه؟
في احزاب علي اساس ديني ولا مفيش؟
الماده التانيه شغاله ولا مش شغاله؟

الاخوان .. تناقضات تناقضات تناقضات

دا غير السلبية طبعا لأنهم مقاطين الاستفتاء

---

انهارده الساعة 6 هيكون في اعتصام في ميدان التحرير هيشارك فيه كل القوي السياسيه لرفض التعديلات الدستوريه وهيستمر لغاية تاني يوم( الاتنين يوم الاستفتاء) الساعه 10 الصبح.

مش عارف اذا كنت هقدر اجي ولا لأ .. اما اشوف هقدر ازوغ من البيت ولا ايه النظام؟

---

اضافه:

صور وفيديو للاعتصام






6 comments:

mo7a_1704 said...

bos yabny ana mesh 3aref 7aga men elli enta bet2olha dih bas all i can say enn feeh 7aga enta betfty feeha w hya qanoon el 2rhab dah...wat u said eno lama yosdar hyb2a kaza w kaza...since when wenta sha3'al monagem

Karim.. said...

Bos ya Ostaz Mo7a... Yesterday 3ala el 3ashera masa2an... El nas kanett rafda el mabade2 beta3et el qanoon dah 3ala e3tebar enno momken ye3mello abusing lel law ( Kal 3ada ).. Ana 3aref en el law lessah manzelsh bas bedayto nila... :S

Mina said...

mo7a_1704

اولا شكرا عالتعليق

ثانيا احب اقولك انه تم الانتهاء من صياغة 15 ماده من القانون .. واطلع عليهم اعضاء مجلس الشعب .. الخبر مش جي من فراغ ولا فتي يعني

ثالثا شوف اللينكات دي يمكن تساعددك

1-تعريف كلمة الارهاب في مصر وكيف انه يلغي حق التظاهر وابداء الرأي

http://asharqalawsat.com/leader.asp?section=3&article=411564&issue=10340

تخيل بقي لو بقي دستور

2- القانون اصلا يتعارض مع الدستور( في 3 مواد)

http://www.asharqalawsat.com/details.asp?section=4&article=406655&issue=10307

3-استهبالا وليس تعديل دستوري
http://www.egymasr.com/?p=89

وشكرا مره تانيه ويارب تكون وصلت

Mina said...

Karim

thanks for commenting and for answering mo7a

Peter Chen said...

Hi Mina,

Thanks for leaving a comment in my post Why I changed the title of this blog. I have responded to your comment.

Peter
Dummies Guide to Google Blogger
"online book" in progress

Anonymous said...

ya gama3a bgad 7aram , nefsy marra netla3 l 2odam ba2a , moritanya ba2o ye5taro el ra2ees bta3hom we7na bnerga3 lel 3asr el malaky , w ma7adesh bytkalem , wa7da enahrda tal3a 3ala el tv bt2ool ana gayya a2ool na3am 3ashan akeed 7osny mubarak msh 3ayez ydorena , 3'albana , akeed mabet3arfsh te2ra , law kanet aret el ta3delat aslan makansh dah akeed hayeb2a ra2yaha