Sunday, April 29, 2007

خطايا وزير التعليم


لأني ضحيه من ضحايا هذا الرجل .. للأسف اكن له كره وبغض شديد ليس لشخصه ولكن لما وقع فيه من خطايا لا تغتفر.

مش عارف ابدأ منين الصراحه .. واتكلم عن ايه ولا ايه .. انا فاكر ايام امتحانات تالته ثانوي .. كانت فتره من اسوأ فترات حياتي .. امتحانات في منتهي التخلف والتعقيد.

العربي .. دا مصيبته مصيبه .. نموذج الاجابه غلط .. كل مدرس يصلح علي مزاجه .. وفي طبعا في ناس حقها ضاع لأن في مدرسين ميعرفوش حاجه عن المنهج ( مدرسين اول ثانوي) .. ودول بالسلامه طبعا .. والغريب انهم اكتر من سؤال .. يعني اللي حط النموذج دا كان متوول .. شارب حاجه ..

الانجليزي .. ولأول مره في تاريخك يا مصر نسمع عن حالات انتحار بسبب امتحان .. عمري ما هنسي البنت اللي روحت مكتئبه بعد الامتحان قامت شدالها مبيد حشري وطبعا ملحقوهاش وراحت فيها .. ملعون ابو التعليم يا اخي .. والبيه طالع بعدها في البيت بيتك يقولك دي حاجه تزعل اكيد .. تصدق كنت فاكرها حاجه تفرح .. عملوا ايه اهلها بطلعتك البهيه دي .. خدوا ايه من التعليم غير ضياع بنتهم!

الفزيا .. سابقه من نوعها بردو .. مفيش شكاوي من امتحان الفزيا غريبه .. بس ميقدروش يسكتوا ..
وراها علي طول امتحان الاحصا .. وتتوالي حالات الاغشاء .. انا فاكر بعد الاحصا دا طلعت من اللجنه قعدت في حوش المدرسه القذره اللي كنت بمتحن فيها وجبت ازازة ميه ساقعه ودلقتها علي دماغي .. كنت بحاول افوق نفسي من الصدمه.

وطبعا محدش ينسي امتحان التفاضل وامتحان الميكانيكا .. الصراحه دول انهوا كل امل الطلبه نهايه مأسويه .. بس بردو الوزاره كانت حنينه .. حطط التفاضل تاني امتحان والميكانيكا اخر امتحان .. وماله تنويع بردو!

سابقه اخري تسجل بأسم السيد الوزير وهي الغش الجماعي .. مش عارف اقول ايه بجد .. غش جماعي ؟؟ .. دانا كنت في عرض سؤال في امتحان الميكانيكا يا ولاد الـ***.

انتحار .. اغماء .. وتقطيع ورق .. ايه مش مصدق؟ .. مشرفين اللجان كانوا بيلعبوا بازل .. ورقه من هنا علي ورقه من هنا .. خلينا ننفع الناس .. حاجات جميله!

المهم بعد كل المصايب والمهازل دي .. طلعت النتيجه .. مجاميع رهيبه .. صاروخ الحد الادني للكيات غلي .. قصدي ارتفع زي الاسعار .. بقي يا عيني اللي جايب 96 في علمي علوم ميلحقش حاجه .. يا نهار اسود .. حتي المجاميع غليت .. الله يرحم خال امي اللي دخل صيدلة القاهره بـ46 % خد بالك 46 مش 64!

اكتشفنا ان عندنا مليون الا ربع زويل .. مليون الا ربع يحي المشد .. وطبعا دا كله بفضل جهود السيد وزير التشعليم.

طبعا مقدرش انسي الاء .. عيله في اولي ثانوي قالت ان مصر بقت دلدول امريكا في المنطقه .. س وج وتحقيق .. لحد اما بابا حسني تدخل وطلع البت براءه وأكد علي حريه التعبير وأهميه تربيه النشء علي الديموقراطيه .. المهم انه في نفس الوقت كانت قضيه ابراهيم عيسي ووائل الابراشي مرفوعه اما المحاكم بأسم الرئيس!

وازمة كادر المعلمين اللي حولت اعتراض المعلمين علي الوزاره الي اعتراضهم علي النظام ككل .. استمرارا لموجة انقلاب جميع الفئات علي النظام من قضاه وصحفيين ومهندسين وعمال .. الخ.



فشلت فشل زريع في اختبار اول سنه يا معالي الوزير وللأسف اختبارك ملوش ملحق .. انت كده كده طالع السنه اللي بعدها .. يعني علي قلبنا الي ان يشاء القدر.

---

بمناسبة التعليم نزلوا علي الجامعه كلها بكل كلياتها منهج حقوق انسان
.. ماده ملهاش تلاته لزمه كده ومش هتضاف عالمجموع .. هنضحدك علي بعض احنا عندنا حقوق انسان أصلا!
---
تحديث : افتكرتله مصيبه كمان تصريح قاله ان اي تظلم هيتقدم هيتم تصحيح الورقه من اول وجديد .. وطبعا اما دخلنا في الجد رجع وقالك لا احنا هنعيد رصد الدرجات .. انا قلت كده عشان اهدي الناس.

حركه طفوليه في منتهي السذاجه ..لا تصلح ان تصدر من واحد المفروض يعني انه رئيس وزارة بيسموها وزارة الشعب .. جتها نيله!
ه


12 comments:

Anonymous said...

w 3shan t3rf ya mina en elragel da sakafto was3a da mktfash belsanaweya el3ama bs da kaman 3'r nezam elamerican w ramany mn sydla b3d ma kont gayeb mgmoo3ha wadany alsun allahom la e3trad ya a5y bs ana 3ayez a3rf 7aga eza kan elamerican a5er mgmoo3hom 115% ezay asnan ta5od 122% afhmha de ????????? lw l2it 7l 2olly sadik elanonymous :D

صاحب البوابــة said...

مقال مؤثر

يكشف مستوى انحدارنا في منهجية التعليم

حقيقة لا اجد ما ارد به

سوى

حسبي الله ونعم الوكيل

في كل من ساهم في افساد هذه البلد

ولو بصمته عما يجري فيها من فساد

تحياتي لقلمك المبدع

الزعيـمة said...

Mina

اولا بشكرك على تعليقك فى مدونتي
ثانيا بحييك على فكرك فى اغلب مقالاتك المعروضة فى المدونة

تقبل ارق التحيه

شباب روش طحن said...

هذه هي الحقيقة فمستوانا التعليمي منحدر جدا انا ولله الحمد خلصت من الثانوية العامة ولكن بقيت لي وزراة التعليم العالي وربنا يستر

أمــانــى said...

كل ده شايله فى نفسك حرام عليك
يغور التعليم اهم حاجة صحتك يا بنى هو جه على التعليم يعنى يا عم مينا
بس انت شد حيلك كويس وربنا يكرمك مالكش دعوه ولا بوزير ولا غيره لانهم كلهم كانوا بتعلموا فينا اصلا هنقول ايه
عليهم ربنا

bocycat said...

حسبنا الله ونعم الوكيل هو التعليم بس ؟؟ ده العلاج وال........؟؟؟؟؟؟؟؟؟؟؟؟؟؟؟؟؟

نبيــذ said...

التعليم المصرى فى عداد الراحلين من قبل أن يضعوا هذا البهلوان فى كرسى الوزير

yamen said...

الله يكون في عونك يا عم مينا

الواحد في ايام الدراسة بيدعي علي وزير التعليم الواطي (التعليم يعني مش الوزير)و في الكلية بيدعي علي وزير التعليم العالي(شفت بقه انه التعليم) وبعد مايخلص بيقعد علي القهوة بيدعي علي وزير القوي العاملة ورئيس الوزارة..مش عارف لما اتجوز هادعي علي مين


تحياتي

دوللي said...

يااااااااااااااااااااااااااااه ليه كده فكرتني بالذي مضي و الحمد لله و يارب مايعودش تاني ده التعليم ده هم وانزاح وللاسف من غير ماافهم حاجه و لا افهم ايه لازمه اللي اتعلمته اقصد حفظته لحد الامتحان و بعدين نسيته طبعا لان مفيش تطبيق و لانه بعيد عن الواقع
تحياتي

Mina said...

anonymous

معلش مهو اذا كان اصلا فشل في الثانويه العامه يبقي هينجح ازاي في الدبلومه الامريكيه

---

صاحب البوابه

اشكرك علي التحيه ونورت مدونتي

---

الزعيمه

اشكرك علي رأيك ونورتي المدونه

Mina said...

شباب روش طحن

للاسف هي دي الحقيقه المره

نورت المدونه

---
اماني

شكرا علي النصيحه :D ماشي

---
bocycat

اعتقد انه اصلا مفيش علاج يا بوي كات .. العلاج هو البتر

شكرا علي تعليقيك

Mina said...

نبيذ

موافقك يا نبيذ .. بس الراجل دا خربها خالص تراكمات السنين ظهرت السنه اللي فاتت بشده .. يا عالم اللي جي عامل ازاي

---
yamen

علي رأيك .. الشعب المصري علي طول بيدعي علي الوزرا .. في اي مرحله في حياته لازم تلاقي وزير ينغض عليه عيشته

نورت المدونه:)

---
دوللي

ولا عمر التعليم هيبقي ليه لازمه اصلا .. الواحد بيخض يبخ اللي صمه في ورقو الامتحان ويطلع ناسي! ..شكلك ضحيه من ضحيايا الوزاره دي .. كلنا يعني مش لوحدك

:) شكرا علي التعليق