Tuesday, August 19, 2008

خلى الدماغ صاحى

أسكن فى بيتنا الحالى منذ الثامنة من عمرى .. أى منذ حوالى 11 عام تقريباً
ولم تكن المرافق أكتملت وقتها عندما إنتقلنا من بيتنا القديم

فلم يكن هناك سوى المياة والكهرباء والتليفون الذى بدأ لاسلكياً وتحول بعد ذلك إلى تليفون أرضى بعد فشل التجربة المصرية الفريدة!

المهم حطوا عواميد النور من بتاع 3 سنين .. واخيراً جائت سنة الحسم .. وقرروا يدخلولنا الغاز .. وبطلنا نجيب انابيب بيب ..

وكمان هيسفلتوا الشارع .. دا إيه الهنا دا كله ..

عشان تبقوا متخيليين الموقف .. منطقتنا جزئين .. جزء إتسفلت من زمان .. وجزء لسه خلصان وهوالجزء الذى يقع فيه بيتنا العزيز ..

بدأت عملية رصف الشارع أو السفلتة .. أحمدك يارب .. أى نعم شارعنا اخر شارع اتسلفت .. بس اهو اتسفلت ..

انهارده مروح بيتنا عادى فقررت اوقف التاكسى عند أول الشارع واتمشاها لجوة وأنا رافع راسى .. شارعنا متسفلت يا ناس ..

وبدأت فى السير فى الشارع وكلى فخر وزهو بشارعنا الجديد المتسفلت ..

وأثناء سيرى إذ بى أجد ثلاث رجال يدقون بفأس على الشارع وإذ بالفخر والزهو ينطفئان بعض الشئ ..

ماذا يفعل هؤلاء القوم الأشرار بشارعنا الجديد؟ .. وكل هبده والتانية دبببب .. لأااا لم أحتمل أن أرى شارعنا وهو يتدمر تحت وطئة الإحتلال ..

أقتربت بعض الشئ .. مديت راسى عشان ابص ..

بيركبوا بلاعة .. آااه .. بلاعة .. 11 سنة ساكن فى المنطقة استنوا لما الشارع اتسفلت وقرروا يركبوا البلاعات..

خقت أن أعلق حتى لا يكون مصيرى مثل مصطفى شعبان "كامل" فى الفيلم المذكور أعلاه .. وقررت إختصار المشهد وصرخت عالياً:

يا ام بتعة هيركبوا بلاعات .. لولولولولولوللوىىى

ء

6 comments:

mina said...

امال الشارع كان ماشى من غير بلاليع كل دة ؟؟؟؟؟؟؟ هما الظاهر كانوا عملين بلاعات لاسلكى بس الخطة فشلت ..... حمد الله على السلامة بعد طول غيبة

Andrew said...

أنت لو أخدت بالك أرتفاع الباكابروت خمسة سم آل عشان لما يرصفوا تاني!

Mina Fayek said...

mina:
أنا عارف .. الله يمسيها بالخير هيئة الصرف الصحى سترانا على طول ..

الله يسلمك :D

andrew:

اه .. منا مش فاهم ايه النظرية!

Andrew said...

نظرية كدة زي نظرية طاظا ف طاظا
أصل البواب بتعنا سأل العمال قالهم أنتو بما معناه "أنتم مش مهتميين في بالسفلتة لية" قالولوا "إن دي طبقة اسفلت خشنة و هايرصفوا بطبقة اسفلت أنعم يفنشوا السفلتة الأخيرة

عشان مدة العمال مش خايفين على طبقة الأسفلت وهما بيحفروا وخلو البكابورتات عالية... مش مهم بقى تبوظ العربيات ولا حاجة المهم التنفيذ

طبعا أنا عشمت نفسي ان دة يحصل مس أنا أول مرة أسمع ان في طبقتين لاسفلت

micheal said...

يا عم عادي مصر كل حاجة فيها مشاية بالمشقلب ولازم نستني حودث المصيبة حتي ياتي رد الفعل
تحياتي

Mina Fayek said...

andrew:
طبعا دى اوامر عليا

micheal:
غباء ادارى .. ارحمنا يارب